Мара Агінскага пра тое, што народы былога Вялікага Княства Літоўскага і Рэчы Паспалітай зноў адчуюць сябе адзінай супольнасцю, здзяйсняецца на нашых вачах. А спрыяюць гэтаму неабыякавыя людзі, дзякуючы якім у Беларусі, Літве, Польшчы і іншых краінах зберагаецца і прымнажаецца спадчына Міхала Клеафаса Агінскага і яго роду, вывучаюцца падзеі часу, калі ствараўся паланэз «Развітанне з Радзімай».

Рыгор Сарока, дырэктар Рэтаваскага культурна-гістарычнага музея Агінскіх Вітаўтас Руткаўскас і старшыня Літоўскай нацыянальнай камісіі ЮНЕСКА Ромас Пакальніс у час міжнароднага круглага стала ўдакладняюць праграму сумесных мерапрыемстваў, прысвечаных юбілею М.-К. Агінскага.

Пра гэта гаварылі ўдзельнікі міжнароднага круглага стала, які нядаўна прайшоў у Вільнюсе і быў прысвечаны падрыхтоўцы да святкавання 250-гадавіны нараджэння М.-К. Агінскага. Праходзіла пасяджэнне ў сакратарыяце Літоўскай нацыянальнай камісіі ЮНЕСКА. Беларускі бок на мерапрыемстве прадстаўлялі актывісты мясцовага дабрачыннага фонду «Спадчына Міхала Клеафаса Агінскага», а таксама дзеячы культуры і мастацтва нашай краіны. Сярод іх -- намеснік галоўнага дырэктара тэлеканала «Беларусь-3» Сяргей Макарэй.

Прыхільнікам творчасці вядомага кампазітара, дыпламата, паўстанца і грамадскага дзеяча было што расказаць адзін аднаму. У тым ліку, як сустрэлі ў Беларусі і Літве 249-гадавіну з Дня нараджэння Агінскага і што плануецца зрабіць у гонар кампазітара ў наступным годзе.

Рэпетыцыя ўдалася

Беларускія ўдзельнікі круглага стала адзначылі, што для нашай краіны святкаванне Дня нараджэння аўтара паланэза «Развітанне з Радзімай» сёлета стала своеасаблівай рэпетыцыяй будучага юбілею кампазітара. Так, у рамках святочных мерапрыемстваў адбылося адкрыццё пасля рэстаўрацыі палаца ў Залессі, урачыстая вечарына ў Маладзечанскім музычным каледжы, пленэр маладых мастакоў Маладзечаншчыны і іншае.

А адной з самых яркіх і запамінальных падзей было светлавое шоў на музычным падвор'і музычнага каледжа. Тут дэманстраваліся фільмы пра нашага славутага земляка, а таксама пра тое, як зберагаецца ў нашай краіне яго спадчына. Прычым, экранам служыла сцяна аднаго з будынкаў. Па словах намесніка старшыні праўлення фонду Уладзіміра Сівухі, праз год светлавое шоў плануецца паўтарыць на Маладзечанскім замчышчы.

Дыпламатыя мастацтва

Актывісты фонду ля палаца Тышкевічаў ва Ужутракісе (Тракайскі гісторыка-культурны парк).

Старшыня праўлення фонду, дырэктар Маладзечанскага музычнага каледжа Рыгор Сарока на круглым стале зазначыў, што наступны год згодна з рашэннем ЮНЕСКА будзе прысвечаны М-.К. Агінскаму. Гэта адбылося дзякуючы супольным намаганням дзяржаўных устаноў і грамадскіх арганізацый Беларусі, Літвы і Польшчы. Каб годна адзначыць юбілей славутага кампазітара, маладзечанцы плануюць арганізаваць міжнароднае турнэ музыкантаў вышэйназваных краін. Завершыцца яно ў Фларэнцыі, дзе пахаваны аўтар паланэза «Развітанне з Радзімай». У планах фонду таксама правядзенне міжнароднага пленэра мастакоў у нашым горадзе, перавыданне мемуараў Агінскага, выпуск сувенірнай прадукцыі, арганізацыя конкурсу праектаў па добраўпарадкаванні Маладзечанскага замчышча і іншае.

Па словах надзвычайнага і паўнамоцнага пасла Літвы ў Беларусі Эвалдаса Ігнатавічуса, урады краін-суседак зацікаўлены ў пашырэнні культурных кантактаў. Таму міністэрствы замежных спраў і культуры Беларусі і Літвы будуць каардынаваць свае намаганні пры падрыхтоўцы да 250-гадовага юбілею кампазітара. Дамоўленасць пра гэта ўжо ёсць.

Як адзначыла генеральны сакратар літоўскай нацыянальнай камісіі ЮНЕСКА Марыя Дрэмайтэ, у юбілейны год у дзеячоў культуры Беларусі і Літвы ёсць цудоўная магчымасць заявіць пра сябе і ў штаб-кватэры гэтай арганізацыі ў Парыжы. Цалкам магчыма, што тут пройдзе фотавыстава, прысвечаная месцам, дзе жыў Агінскі і канцэрт яго твораў.

Зямля герояў

Пасля круглага стала адбылася яшчэ адна прыемная падзея -- у вёсцы Аборак завяршылася добраўпарадкаванне пахаванняў контр-адмірала Расійскага флоту Івана Канаржэўскага і яго сваякоў. А дапамаглі валанцёрам прывесці магілы ў парадак супрацоўнікі пажарнага аварыйна-выратавальнага атрада.

Дарэчы, цікавасць фонду да Аборка не выпадковая. Менавіта ў гэтай вёсцы ў 1800 годзе нарадзіўся Леанард Ходзька, які быў асабістым сакратаром аўтара паланэза «Развітанне з Радзімай». А дзядзька Міхала Клеафаса Агінскага, Францішак Ксаверый, у свой час узвёў вакол мясцовага касцёла і могілак муры. І яшчэ, праз Аборак і Палачаны праходзіць краязнаўчы турыстычны маршрут па месцах, звязаных з М-.К. Агінскім.

Для супрацоўнікаў пажарнага аварыйна-выратавальнага атрада ўдзельнічаць у добраўпарадкаванні пахаванняў Канаржэўскіх – вялікі гонар.

- Удзельнічаць у падобным мерапрыемстве для нас – вялікі гонар, - адзначыў намеснік начальніка атрада Сяргей Яўсеенка. – Прадстаўнікі роду Канаржэўскіх на асабістым прыкладзе паказалі, як трэба служыць Радзіме. Гэтакжа быў аддадзены сваёй краіне і Міхал Клеафас Агінскі.

Алег БЯГАНСКІ. Фота АЎТАРА.
http://www.mgazeta.by/Kultura/Podgotovku-k-prazdnovaniiu-250-letiia-Mikhala-Oginskogo-obsudili-v-Vilniuse